तब्बल ३१ वर्षानंतर ‘चारचौघीं’ची पुनर्भेट होणार
तब्बल ३१ वर्षांपूर्वी रंगभूमीवर गाजलेले ‘चारचौघी’ हे माईलस्टोन नाटक पुन्हा एकदा नव्या संचात रंगभूमीवर येत आहे. या नाटकाचा शुभारंभ १७ सप्टेंबर रोजी मुंबईत होत आहे. ज्या तरुण पिढीने हे नाटक बघितलेले नाही, त्यांच्यासाठी नव्या संचातील हा प्रयोग औत्सुक्याचा विषय ठरला आहे; तर ज्या पिढीने हे नाटक बघितलेले आहे, त्या पिढीची या नाटकासोबत पुनर्भेट होणार आहे.
‘जिगीषा’ ही नाट्यसंस्था हे नाटक रंगभूमीवर आणत आहे. या नाटकाचे लेखन प्रशांत दळवी यांनी केले असून, दिग्दर्शन चंद्रकांत कुलकर्णी यांनी केले आहे. अशोक पत्की यांचे संगीत, संदेश बेंद्रे यांचे नेपथ्य, रवी-रसिक यांची प्रकाशयोजना या नाटकाला लाभली आहे. या नाटकासाठी उलेश खंदारे यांनी रंगभूषा; तर प्रतिमा जोशी व भाग्यश्री जाधव यांनी वेशभूषा सांभाळली आहे.
‘चारचौघी’ या नाटकात रोहिणी हट्टंगडी, मुक्ता बर्वे, कादंबरी कदम, पर्ण पेठे, श्रेयस राजे, निनाद लिमये व पार्थ केतकर या कलाकारांच्या भूमिका आहेत. या नाटकाचे निर्माते श्रीपाद पद्माकर असून सूत्रधार प्रणित बोडके आहेत. सध्या सर्वच कलाकार या नाटकाच्या तालमीत रंगले आहेत. विशेष म्हणजे, बुधवारी दीनानाथ नाट्यगृहावर या नाटकाच्या शुभारंभाच्या प्रयोगासाठी प्रेक्षकांनी तिकिटे मिळवण्यासाठी मोठी रांग लावली होती. यावरून आजही या नाटकाविषयी उत्सुकता कायम असल्याचे दिसून येत आहे.
या नाटकाविषयी बोलताना दिग्दर्शक चंद्रकांत कुलकर्णी म्हणतात, १९९१ मध्ये आम्ही आणलेल्या या नाटकाला एका सामाजिक चळवळीची पार्श्वभूमी होती. आम्ही ‘स्त्री’ नावाची एक एकांकिका केली होती. पण प्रशांतच्या डोक्यात एक चांगला आशय आणि विषय होता व तो मुख्य धारेत आणायचा होता. यातून ‘चारचौघी’ घडत गेले. छोट्या-मोठ्या हक्कांसाठी स्त्रियांच्या जाणिवांचे हक्काचे जे लढे तेव्हा सुरु होते, त्यातला प्रचाराचा भाग न घेता त्यातल्या मानवी व्यक्तिरेखा व आशय घेऊन हे नाटक लिहिले गेले होते. त्या दशकाची सुरुवात झालेले महत्त्वाचे पहिले नाटक ‘चारचौघी’ हे होते.
हे नाटक महाराष्ट्रातील अधिकाधिक प्रेक्षकांपर्यंत आम्ही पोहोचवण्यासाठी सज्ज आहोत, असे या निमित्ताने बोलताना निर्माते श्रीपाद पद्माकर सांगतात. ज्या जुन्या पिढीने हे नाटक आधी बघितले होते, त्यांनाही हे नाटक नवीन संचात बघण्याची उत्सुकता आहे. या नवीन प्रयोगालाही उत्तम प्रतिसाद मिळेल याची आम्हाला खात्री आहे, अशा भावनाही श्रीपाद पद्माकर मांडतात.
