आपण एखाद्या मित्राची वाट बघत असतो, पण ठरल्यावेळी तो येत नाही. तो उद्या येईल असं आपण आपल्या मनाला समजावतो पण तो दुस-या दिवशीही येत नाही.आपली निराशा होते. त्याला आपण जवळजवळ विसरतो. पण आतल्या आत मनाची घालमेल होतच राहते. मग बहुतेक तो उशिरा येईल किंवा येणारच नाही अशी मनाची अटकळ करतो आणि मग एके दिवशी अचानक अगदी ध्यानीमनी नसताना तो येतो. बेधुंद होऊन अशा मित्रासारखाच पहिला पाऊस येतो तेव्हा आपण त्या आनंदाने सुखावून जातो.
एका छोटयाशा दुर्गम खेडेगावात पाऊस न आल्याने गावातल्या विहिरी पाण्याचा ठणठणाट झाला आहे, सरकार कडून पाण्याचे टँकर देखील पाठवण्यात येत नाहीयेत मोठ्यांची पानावरुन रोजची भांडण ठरलेली आहेत त्यात गावात हिंदू मुस्लिम अशी संमिश्र वस्ती आहे.पण पाण्यामुळे त्यांच्यातही धुसपुस सुरू असते. गावातील बच्चे कंपनी मात्र या पासून अलिप्त असून धमाल करत असतात त्यात पाणी नसल्याने शाळा बंद होते तेव्हा मात्र या लहानग्यांना पावसाचे पर्यायाने पाण्याचे महत्व पटते ते सुद्धा पावसाची प्रतिक्षा करू लागतात. त्यासाठी ते आभाळाकडे डोळे लावून बसले आहेत. वडीलधारी मंडळी पाणी मिळवण्यासाठी काहीच प्रयत्न करतांना दिसत नाहीयेत तेव्हा ही बच्चे कंपनी पाणी आणायचे ठरवते….
पाणी कुठून मिळते?
त्यासाठी लहान मुले काय प्रयत्न करतात?
मोठ्यांना ते पटते का?
हे सर्व तुम्हाला चित्रपट बघूनच कळेल.
आपलं आणि पावसाचं नातं अगदी जवळचं असतं. हेच नातं अधोरेखित करताना पावसाची हलकी-फुलकी कथा मांडण्याचा प्रयत्न या चित्रपटात करतांना दिसून येतो.
‘एस.क्यूब फिल्म्स इंडिया एलएलपी’ यांनी या चित्रपटाची प्रस्तुती केली असून सहनिर्मिती अँन्या झँग (बटरफ्लाय फिल्म्स) यांची आहे.
ग्यानचंद चौहान, सुमेध गायकवाड कार्यकारी निर्माते आहेत. चित्रपटाच्या छायांकनाची जबाबदारी योगेश एम.कोळी यांनी सांभाळली असून संकलन चंदन अरोरा यांनी केले आहे. कथा भूषण दळवी तर पटकथा शफक खान, भूषण दळवी यांची आहे. संवाद अभिषेक करगुटकर, विनोद जाधव यांनी लिहिले आहेत. अमोल पोवळे यांनी लिहिलेल्या गीतांना सुशांत पवार, किशोर पवार यांनी संगीत दिले आहे. अवधूत गुप्ते आणि स्वप्नील बांदोडकर यांचा स्वरसाज चित्रपटातील गीतांना लाभला आहे. साऊंड झाकीर हुसैन तर कलादिग्दर्शन योगेश इंगळे यांचे आहे.
छाया कदम, मिलिंद शिंदे, संदेश जाधव, चिन्मयी साळवी, विनायक पोतदार, आर्या आढाव, प्रदीप नवले, प्राजक्ता वाड्ये, वैभव जेऊघाले पाटील, हृषीकेश करळे, नकुल चौधरी, वैष्णवी रानमाळे, उत्कर्ष करळे, अचला पांचाळ, प्रज्ञा गोपाले यांच्या भूमिका या चित्रपटात आहेत.
