*राष्ट्रीय पुरस्कार विजेत्या जोडीचा नवा चित्रपट ‘मूर्ती’!*
कला जेव्हा समाजाचे वास्तव प्रतिबिंबित करते, तेव्हा ती केवळ मनोरंजनाचे माध्यम राहत नाही, तर विचारप्रवर्तक ताकद बनते.
समाजातील ज्वलंत प्रश्नांना संवेदनशीलपणे मांडत, प्रेक्षकांच्या मनावर कायमस्वरूपी ठसा उमटवण्याची हातोटी दिग्दर्शक शिवाजी लोटण पाटील यांनी यापूर्वी सिद्ध केली आहे. त्यांच्या चित्रपटांमध्ये केवळ मनोरंजन नसून सामाजिक भान, वास्तवाची जाणीव आणि विचारांना चालना देणारा आशय असतो. त्यामुळेच पहिल्याच चित्रपटातून राष्ट्रीय पुरस्कार पटकावणाऱ्या शिवाजी लोटण पाटील यांच्या प्रत्येक नव्या चित्रपटाकडे प्रेक्षक आणि चित्रपटसृष्टीचे विशेष लक्ष असते.
‘मूर्ती’ हा चित्रपटदेखील याला अपवाद नसून, एका वेगळ्या विषयाला प्रभावी सिनेमॅटिक मांडणी देत समाजाला अंतर्मुख करणारा अनुभव देणार असल्याची उत्सुकता निर्माण झाली आहे. कथा, पटकथा आणि दिग्दर्शन शिवाजी लोटण पाटील यांचे आहे.
चित्रपटाच्या तांत्रिक बाजूची जबाबदारी अनुभवी आणि कुशल तंत्रज्ञांच्या टीमने समर्थपणे सांभाळली आहे. मयुरेश जोशी यांनी छायांकन, हनी सातमकर यांनी संगीत, निलेश नवनाथ गावणे यांनी संकलन, तर रमेश इनामती यांनी ध्वनी संयोजनाची धुरा सांभाळली आहे. चित्रपटाचे कलादिग्दर्शन आकाश शिवाजी माळी, वेशभूषा माधव बाळुते, मेकअप नितीन दांडेकर आणि स्थिर छायाचित्रण (स्टिल फोटोग्राफी) नितीन भावसार यांनी केले आहे.
‘मूर्ती’ हा चित्रपट मराठी चित्रपटसृष्टीत एक वेगळी आणि ठळक ओळख निर्माण करेल, असा विश्वास चित्रपटाच्या संपूर्ण टीमला आहे.
