चित्रपट, नाटक, मालिका,आणि वेब सिरीज या माध्यमांचा वापर समाज घडवण्यासाठी करता येऊ शकतो असं मानत काम करणाऱ्या फिल्ममेकर्सपैकी एक आहेत अमृता अरुण राव… त्यांच्या “अमृता फिल्म्स” या निर्मिती संस्थेनं २००२ मध्ये ‘मानिनी’ या चित्रपटाद्वारे मनोरंजन विश्वात प्रवेश केला. आजवरच्या प्रवासात त्यांनी ‘मानिनी’, ‘वादळवारं सुटलं’, ‘हंबरडा’, ‘आरोही, गोष्ट तिघांची” तसेच प्रदर्शनासाठी प्रलंबित असलेले “हा मी मराठी” आणि “साप शिडी” असे एका पेक्षा एक आशयघन चित्रपट बनवले आहेत. आता ‘श्यामची आई’ या चित्रपटाच्या रूपात त्यांनी एक नवं आव्हान स्वीकारलं आहे. यात त्यांच्या जोडीला हरहुन्नरी तरुण दिग्दर्शक सुजय डहाके आहे. सुजयच्या दिग्दर्शन शैलीतून प्रेक्षकांना ब्लॅक अँड व्हाईटमध्ये ‘श्यामच्या आई’चं दर्शन घडणार आहे.
सुजयनं ‘श्यामची आई’ हा चित्रपट बनवण्याचा प्रस्ताव ठेवला आणि तो आवडल्यानं लगेच होकार दिल्याचं सांगत अमृता म्हणाल्या की, आज क्राईम, सेक्स आणि व्हायलन्सचा बोलबाला आहे, यातून नवीन पिढीवर काय संस्कार होणार? आजची लहान मुलं ही उद्याची तरुण पिढी आहे. स्वत:चं करियर करताना बहुतांशी पालकांचं मुलांकडे दुर्लक्ष होत आहे. नव्या पिढीवर संस्कार करण्यासाठी ‘श्यामची आई’ या सारख्या चित्रपटांची गरज आहे. ‘श्यामची आई’ हा चित्रपट माईलस्टोन आहे. वाचलेली पुस्तकं, वाचलेले धडे, पाहिलेले चित्रपट , त्याचा पगडा आपल्या मनावर कायमचा असतो त्यामुळं या विषयावर चित्रपट बनवण्यासाठी मी पुढाकार घेतला. सुजय हा संवेदनशील विषय सहजपणे हाताळणारा दिग्दर्शक असून तो स्वत:ला झोकून देऊन विषयाचा सखोल अभ्यास करतो. या चित्रपटाचा विषय कोकणातील असल्यामुळे शक्यतो कलाकार कोकणवासीय घेणार आहोत. प्रत्येक कॅरेक्टरचा लुक वास्तववादी असावा याकडे आमचा कटाक्ष असेल तसेच ऑडीशन्सद्वारे नवोदित कलाकारांना प्राधान्य देण्यात येईल.
२४ वर्षे दूरदर्शनवर बातम्या देणाऱ्या अमृता एम. एससी., एलएलबी आहेत. कानडी भाषेतून शालेय शिक्षण झालेल्या अमृता सातवीत असताना मुंबईत आल्यावर मराठीशी संबंध आला. एज्युकेशन बॅग्राऊंड सायन्स असल्यानं त्यांचा साहित्याशी फार संबंध आला नव्हता. दूरदर्शनसाठी सिलेक्शन झाल्यानंतर मराठीचा अभ्यास सुरू केल्यावर ‘श्यामची आई’ हे पुस्तक त्यांच्या वाचनात आलं आणि त्यांनी चित्रपटही पाहिला. वृत्त निवेदिका म्हणुन दूरदर्शनवर काम करतानाच त्या ३-४ वर्ष कायद्याची प्रॅक्टिस करत होत्या. काही पुरस्कार सोहळ्यांमध्ये परीक्षक म्हणूनही काम केलं असल्यानं उत्तम कलाकृतींची जाण आहे. चित्रपट निर्मितीसोबत अमृता या चार केमिकल कंपन्यांमधे डायरेक्टर या पदावर कार्यरत आहेत. ‘श्यामची आई’बाबत अमृता म्हणाल्या की, मला पुस्तक खूप आवडलं होतं. प्रत्येकाला शामच्या आईच्या रुपात स्वत:ची आई दिसते. पूर्वीच्या चित्रपटात आईनं केवळ श्यामवरच संस्कार केल्याचं पहायला मिळतं. त्यांना तीन मुलं होती. त्यांनी तिन्ही मुलांवर समान संस्कार केले, पण श्याम हा सर्वात खट्याळ मुलगा होता, मस्तीखोर होता. त्यावर संस्कार करणं अवघड होतं. त्याला कदाचित आईला वेगळ्या प्रकारे समजावून सांगावं लागलं असेल. जुन्या ‘श्यामची आई’ या चित्रपटात श्यामच्या इतर भावंडांचा उल्लेख नाही. हा चित्रपट “श्यामची आई” या पुस्तकावर आधारित आहे . या चित्रपटात मात्र श्यामशी निगडित असलेल्या सर्व पैलूंवर भाष्य करण्याचा प्रयत्न करण्यात येणार आहे.
