एमएक्स प्लेयर प्रेक्षकांसाठी घेऊन येत आहे, दोन नवीन मराठी वेबसिरीज. ‘पांडू’ आणि ‘वन्स अ ईअर’ प्रेक्षकांना खदखदून हसायला लावणाऱ्या या दोन्ही वेबसिरीजचा ट्रेलर नुकताच प्रदर्शित झाला असून, या वेबसिरीज २० सप्टेंबरपासून आपल्याला एमएक्स प्लेयरवर विनामूल्य बघता येणार आहेत.
अनुषा नंदा कुमार आणि सारंग साठे दिग्दर्शित ‘पांडू’ ही वेबसिरीज पोलिसांच्या दैनंदिन आयुष्यावर आधारित आहे. सुहास शिरसाट आणि दीपक शिर्के या दोन धाडसी पोलिसांची ही कथा आहे, जे आपले शहर सुरक्षित राहावे, म्हणून सदैव तत्पर असतात. या वेबसिरीजमध्ये पोलिसांच्या रोजच्या जीवनाचे चित्रण अतिशय रंजक आणि विनोदी पद्धतीने दाखवण्यात आले आहे.
एमएक्स प्लेयरच्या ‘वन्स अ ईअर’ या वेबसिरीजमध्ये प्रेमाला मिळालेले एक अद्भुत वळण पाहायला मिळणार आहे. मंदार कुरुंदकर दिग्दर्शित या वेबसिरीजमध्ये निपुण धर्माधिकारी आणि मृण्मयी गोडबोले यांच्या मुख्य भूमिका असून सहा भागांच्या या वेबसिरीजमध्ये या दोघांच्या प्रेमाचा सहा वर्षांचा प्रवास पाहायला मिळणार आहे. कॉलेजमध्ये होणाऱ्या मैत्रीपासून ते प्रेमाची जाणीव होईपर्यंतचे सर्व अनमोल आणि अविस्मरणीय क्षण यात बघता येतील.
