अभिनेते विजय कदम यांचे निधन, कर्करोगाशी झुंज अपयशी ठरली.
अभिनेते विजय कदम (६७) यांचे निधन, कर्करोगाशी झुंज अपयशी ठरली. मराठी सिनेसृ्ष्टी, मालिका, नाटक अशा वेवगेगळ्या क्षेत्रात त्यांनी उल्लेखनीय कामगिरी केली आहे.
विजय कदम यांचा विनोदी अभिनेता म्हणून मराठी सिनेसृष्टीत मोठा दबदबा होता. त्यांनी अनेक प्रसिद्ध नाटकांतही काम केलेले आहे. विजय कदम चित्रपटात वा नाटकाच्या मंचावर दिसले की प्रेक्षकवर्ग खळखून हसायचा. गेल्या कित्येक वर्षांपासून ते कर्करोगाशी झुंज देत होते. त्यांनी कर्करोगावर मातदेखील केली होती. पण दुर्दैवाने तो पुन्हा उद्भवला होता.
कदम यांच्यावर नव्याने झालेल्या कर्करोगावर मुंबईतील अंधेरी येथील एका खासगी रुग्णालयात उपचार चालू होते. मात्र शेवटी औषधांचा परिणाम होत नसल्याने त्यांची प्राणज्योत मालवली. कदम यांना विनोदी अभिनेता म्हणून ओळखले जात असले तरी त्यांनी अनेक गंभीर भूमिकादेखील केलेल्या आहेत.
विजय कदम यांची इन्स्टाग्रावर शेवटची पोस्ट
दरम्यान, विजय कदम यांचे इन्स्टाग्राम खाते आहे. त्यांनी इन्स्टाग्रावर 23 डिसेंबर 2023 रोजी शेवटची पोस्ट टाकलेली आहे. ते इन्स्टाग्रामवर फारसे सक्रिय नव्हते. विजय कदम यांनी आपल्या या पोस्टच्या माध्यमातून त्यांच्या फॉलोअर्सना हसवण्याचा प्रयत्न केला आहे. ‘घरी कोणते कॅलेंडर घ्यावे, यासाठी आठवडाभर चर्चा चालू होती. शेवटी काल ‘निर्णय’ घेतला,’ अशी विनोदी टिप्पणी करणारा फोटो त्यांनी शेअर केला होता.
दरम्यान विजय कदम यांनी ऐंशी ते नव्वदच्या दशकात रंगभूमी गाजवली होती. त्यांनी टूरटूर, विच्छा माझी पुरी करा, पप्पा सांगा कुणाचे अशा महाराष्ट्रभर प्रसिद्ध झालेल्या नाटकांत काम केलं. त्यांनी ती परत आलिया या मालीकेत साकारलेले पात्र तर खास चर्चेचा विषय ठरले होते. दे दणादण, दे धडक बेधडक, इरसाल कार्टी, तेरे मेरे सपने अशा मराठी चित्रपटांतही त्यांनी काम केलं. हळद रुसली कुंकू हसलं या मराठी चित्रपटात त्यांनी साकारलेली भूमिका विशेष चर्चेची ठरली होती.
‘विच्छा माझी पुरी करा’ने घराघरात पोहोचले, रंगमंचावर ‘खुमखुमी’ दाखवली; अष्टपैलू विजय कदमांचा हा सोनेरी प्रवास होता.
पत्नी आणि एक मुलगा असा
त्यांचा परिवार आहे. त्यांच्या पार्थिवावर
आज दुपारी अंधेरी ओशिवरा येथे
अंतिम संस्कार करण्यात येणार आहेत.
गेल्या दीड वर्षांपासून ते कर्करोगाशी
लढा देत होते. त्यांच्यावर उपचार सुरू
होते परंतु आज पहाटेच्या सुमारास
त्यांनी अखेरचा श्वास घेतला.
चष्मेबहाद्दर, पोलीसलाईन, हळद रुसली कुंकू हसलं, आम्ही दोघ राजा राणी हे चित्रपट खूप गाजले. त्यांच्या
जाण्याने मराठी सिनेसृष्टीत एक मोठी पोकळी निर्माण झाली आहे. अनेक कलाकारांनी त्यांच्या निधनावर शोक व्यक्त करत आहेत. त्याचबरोबर त्यांचं
जाणं सिनेसृष्टीसाठी मोठी हानी असल्याची भावना काही कलाकारांनी व्यक्त केली आहे.
प्रशांत दामले
त्यांचं जाणं खूप धक्कादायक आहे. खूप सपोर्ट करणारा अभिनेता गेला. सहकाऱ्यांना नेहमीच ते सपोर्ट करत होते. माझा पहिला चित्रपट मी त्यांच्यासोबत केला होता. त्यांनी मला खूप चांगल्या प्रकारे समजून सांगितलं होतं. त्यांचं जाणं खूप धक्कादायक आहे. आपण नाटकात जे रिअॅक्ट करतो तसं रिअॅक्ट चित्रपटात करायचं नसतं असं त्यांनी मला समोर उभं राहून बसून शिकवलं होतं. समजून सांगितलं होतं. शिकण्याची आणि शिकवण्याची त्यांची इच्छा फार मोठी होती, अभिनेते प्रशांत दामले यांनी श्रद्धांजली अर्पण केली.
